Martel-moord op plot

Swartruggens. – Hulle het hom eers met kookwater gebrand en sy voorkop oopgesny. Toe verwurg hulle hom met ’n skoenveter.

“Dit voel nog só onwerklik. Ek sal nooit weer kan teruggaan na ons huis toe nie.”

Só het ’n verslae mev. Daleen Pieters (33) gister gesê nadat haar man, Frans (44), eergisteraand wreed in hul huis op ’n kleinhoewe aan die rand van dié dorp vermoor is, terwyl sy en haar kinders, Gideon (10) en Anuscka (3), vasgebind moes toekyk.

Mnr. Pieters, ’n mynwerker, het ’n kunsbeen gehad.

“Hulle het om 21:15 die voordeur oopgeskop terwyl ek televisie gekyk het. My man en kinders het toe al geslaap. Hulle het my dadelik met die mes aangeval.”

Die aanvallers het mev. Pieters se been net bo haar enkel op twee plekke tot op die been oopgesny. Hulle het toe haar man en kinders gaan haal en almal in die televisiekamer vasgebind.

“Hulle het my seun gebrand met ’n plastieksak wat hulle gesmelt het en op hom laat drup het. En sy neus is stukkend geslaan en sy oog is blou. Hulle het my dogtertjie net een klap gegee.”

Pieters sê een van die mans het ’n 9 mm-pistool in haar mond gedruk en hulle almal geblinddoek en hul monde toegemaak.

“Hulle het my man eers gemartel en toe doodgemaak. Ek weet nie of hulle hom ook met ’n mes gesteek het nie.”

Dié marteling het van net ná 21:00 tot ongeveer 01:00 die oggend geduur. Die drie aanvallers is toe eers weg nadat hulle die huis geplunder het.

Pieters het toe daarin geslaag om haarself en haar kinders te bevry en na hul bure gehardloop, wat die polisie ontbied het.

Sy en haar kinders is in die plaaslike hospitaal in die dorp behandel. Hulle bly nou eers by haar skoonsuster op ’n plaas in die omgewing.

“Ek is baie seer en vol kneusplekke. My dogtertjie verstaan nog nie wat aangaan nie. Ek sal my seuntjie by ’n sielkundige moet kry,” sê Pieters.

Haar ander 12-jarige seun was nie tydens die voorval tuis nie.

Kapt. Elsabé Augoustides, poliewoordvoerder, sê die aanvallers het net ’n televisiestel en ’n DVD-speler ter waarde van R2 800 gesteel.

Enkele oomblikke later het drie mans mnr. Johan Labuschagne, wat sowat 1 km van die Pieterse se kleinhoewe af bly, se voordeur probeer oopbreek.

“Labuschagne het toe wakker geword. Hy het sy buurman gebel wat toe die polisie gebel het,” sê Augoustides.

Die polisie het kort daarna by die toneel opgedaag en ’n 19-jarige verdagte in hegtenis geneem. Pieters het die verdagte glo reeds gisteroggend uitgeken as een van die drie wat hulle aangeval het.

Volgens Augoustides ondersoek hulle nog die moontlikheid dat die twee voorvalle met mekaar verband hou.

Die verdagte verskyn na verwagting vandag in die Swartruggens-landdroshof.

 Erkenning Media 24