TLU SA / TAU SA

194 James Avenue / Jamesrylaan 194

PO Box 912-51 / Posbus 912-51

SILVERTON / SILVERTON

0127 / 0127

T: (012) 804-8031, F: (012) 804-2014, E: info@tlu.co.za

W: www.tlu.co.za

KENNISGEWING : VEILIGHEID : GEMEENSKAPSOPNAME 2007

Verwysingsnommer:          RK27/1/6

Datum:                                 7 September 2006

Navrae:                                Mnr Chris van Zyl, Bestuurder Veiligheid,

veiligheid@tlu.co.za

Na aanleiding van terugvoer van lede, is gesprek met Statistiek SA gevoer op 24 Augustus 2006 met betrekking tot die bogenoemde opname.  Die volgende is meldingswaardig:

• Nasionale sensusopnames sal voortaan slegs elke 10 jaar geskied.
• Die opname geskeduleer vir 2007 is 'n tussentydse mini-opname om die drastiese veranderinge sedert die laaste sensus (2001) te ondervang.  'n  Wye verskeidenheid gegewens wat in essensie soortgelyk is as die inhoud van 'n nasionale sensus, word ingesluit.
• 'n Voorafopname om die aantal strukture wat vir huisvesting gebruik kan word te bepaal, is tans in proses.  Hierdie opname sluit alle strukture in voorafbepaalde gebiede in die land in.  'n Totaal van ongeveer 181,000 geboue is hierby betrokke.  Hierdie fase is tans in proses.
• 'n Totaal van 1703 afgebakende landelike gebiede wat plase behels, word by die finale data-insameling betrek.  Dit is moontlik dat meer as een plaas in so gebied betrokke mag wees.  Hierdie fase vind gedurende Februarie 2007 plaas.
• Slegs elke vyfde struktuur binne die voorafbepaalde gebied word ingesluit vir die opneem van finale data.
• Die Statistiekwet noop die burgery om antwoorde te verskaf op vrae vervat in amptelike opnames.  Uit die gesprek was dit egter duidelik dat Statistiek SA nie tans hierdie opsie oorweeg nie.

TLU SA INSETTE

Na afloop van die aanbieding, is die volgende standpunte aan Statistiek SA oorgedra:

• TLU SA is positief en konstruktief ingestel om goeie, akkurate en toepaslike statistiek moontlik te maak met dien verstande dat die persoonlike veiligheid en bates van lede nie in die proses gekompromiteer word nie.
• Ooglopend was daar nie oor hierdie opname (soos ook met ander opnames) met die rolspelers (spesifiek TLU SA) in landbou geskakel nie.
• 'n Ooreenkoms bestaan met die Statistikus Generaal in persoon dat geen persoonlike besonderhede van 'n boer wat terugspoorbaarheid moontlik sal maak, in opnames vervat word nie. Die huidige opname maak wel daarvoor voorsiening.
• Van die informasie verlang kan veiligheidsimplikasies inhou as dit in die hande van kriminele beland.
• Dit is maklik vir kriminele om hulle as veldwerkers voor te doen.  Onlangse plaasaanvallers het met groot sukses hulself as SAPD lede voorgedoen.
• Die vertrouensverhouding tussen boere en verteenwoordigers van die owerheid is in ernstige gedrang.

VOORSTELLE GEMAAK

• Die moontlikheid om die blad wat die persoonlike informasie (naam, adres, ens) bevat, kan van die opnamevorms verwyder word en kan die vorms dan later deur middel van die struktuur kollektief ingehandig word.
• TLU SA kan self persone (gesinslede en/of vriende) identifiseer om by die afneem van besonderhede betrokke te wees alhoewel die persoonlike terugspoorbare besonderhede steeds verwyder word.
• Lede kan besonderhede op 'n sentrale plek weg van die plaas, verskaf. (Statistiek SA voorstel)
• Indien TLU SA tydig voorsien kan word van lede wie se eiendom betrokke is by die opname, kan spesifieke reëlings getref word.

RIGLYN VIR OPTREDE

TLU SA handhaaf die posisie dat enige opname van informasie nie terugspoorbaar moet wees en op so manier misbruik mag word om die veiligheid en status van lede negatief te beïnvloed nie.  Terwyl die personeel van Statistiek SA besin oor TLU SA se insette, moet lede wat genader word om deel te neem aan die huidige oefening (tel van strukture), geen ander detail  voorsien as die getal en tipe strukture op hul eiendom nie.

Terugvoer van Statistiek SA na aanleiding van TLU SA standpunte, word tans afgewag.   Daarbenewens het die Dagbestuur op 4 September 2006 vergader en die saak bespreek.  Indien nodig, sal meer detail volg.